حوار صحفي مع مدمن متعافي … كنت ميت وعدت مرة أخري للحياة
ظلمت نفسي ولكن أنقذتها في اللحظات الأخيرة
أجري الحوار: ابراهيم ممدوح السيد – أعداد الاسئلة:ابراهيم اسماعيل
تنسيق مع الضيف: ابراهيم خليفة – كتابة وتنسيق الحوار:محمد صلاح
“في رحلة قاسية بين الألم والسقوط، ثم النهوض من جديد، تبرز قصص التعافي من الإدمان كدليل حي على قوة الإرادة الإنسانية. ضيفنا اليوم ليس مجرد متعافٍ، بل شاهد على تجربة عميقة مليئة بالتحديات والدروس. في هذا الحوار، نقترب من كواليس رحلته، لنتعرف كيف بدأ الطريق، وأين كاد أن ينتهي، وكيف استطاع أن يستعيد نفسه من جديد.”
- إمتى بدأت أول مرة تجرب المخدرات؟
البداية كانت من زمان، كنت لسه مراهق وبدور على أي حاجة تثبت إني “كبرت”
- إيه السبب اللي خلاك تبدأ؟
الفراغ والهروب من ضغوط معينة في البيت، وكنت فاكر إن ده اللي هيريح بالي.
- كنت عارف المخاطر وقتها ولا لأ؟
ولا كنت أعرف حاجة، كنت فاكرها “تجربة وعدت” ومش هتمسك فيا.
- مين كان له تأثير عليك في البداية؟
للأسف، “صحاب السوء” هما اللي زينوا لي الموضوع في الأول.
- هل كان عندك فضول ولا ضغط من صحابك؟
الاثنين مع بعض، فضول أجرب اللي بيحكوا عنه وضغط عشان ميبقاش شكلي “عيل” وسطهم
- كنت شايف الموضوع عادي ولا خطير؟
في الأول كنت شايفه “روشنة” وعادي، مكنتش متخيل إنه طريق اللي يروح ميرجعش.
- إيه كان شعورك أول مرة؟
انبساط مزيف وراحة وهمية، بس الحقيقة كانت بداية الكابوس
- هل كنت تتوقع إنك ممكن تدمن؟
أبداً، كنت بقول لنفسي “أنا أقوى من كدة” وهرجع في أي وقت.
- هل في ظروف معينة ساعدت على البداية؟
غياب الرقابة من الأهل وشوية مشاكل نفسية مكنتش عارف أتعامل معاها
- هل في حد حاول يمنعك وقتها؟
في البداية مكنش حد يعرف، ولما عرفوا كانت السيطرة عليا بقت صعبة.
- إمتى حسيت إن الموضوع بقى إدمان؟
لما لقيت يومي مبيكملش من غيره، ولما حاولت أوقف يوم واحد ومقدرتش
- إزاي الإدمان أثر على يومك؟.
يومي كله بقى متمحور حول “الجرعة الجاية منين؟”، مفيش هدف ولا طموح.
- هل كنت تقدر تتحكم في نفسك؟
التحكم كان صفر، المخدر هو اللي كان بيسوقني مش عقلي.
- إيه أكتر حاجة كنت بتحس بيها وقتها؟
خوف دايم وتوتر، وإحساس بالوحدة حتى وأنا وسط الناس.
- هل حاولت تبطل قبل كده؟
حاولت كتير جداً، بس كل مرة كنت برجع أسوأ من الأول.
- ليه كانت المحاولات بتفشل؟
عشان كنت بعتمد على إرادتي لوحدي، ومكنتش لسه قررت أغير حياتي وبيئتي فعلاً
- هل خسرت علاقات بسبب الإدمان؟
خسرت أغلى الناس، وفقدت ثقة كل اللي حواليا
- إزاي كانت علاقتك بأهلك؟
كانت مدمرة، شك وخناقات ونظرات حزن في عينيهم كانت بتموتني.
- هل الإدمان أثر على دراستك أو شغلك؟
فشلت وضاعت مني فرص كتير كانت ممكن تغير مستقبلي.
- هل كنت بتخبي الموضوع عن الناس؟
طبعاً، كنت عايش بوشين، وش قدام الناس ووش تاني خالص مع المخدر.
- هل حسيت بالندم في وقت معين؟
الندم كان رفيقي كل ليلة بعد ما مفعول المخدر يروح.
- إيه أصعب لحظة مريت بيها؟
لما شفت دمعة في عين أمي بسببي ومقدرتش حتى أعتذر لها.
- هل تعرضت لمشاكل قانونية؟
دخلت في دوامات ومشاكل مكنتش أتخيل إني أتحط فيها بسبب السكة دي.
- هل كنت شايف نفسك ضحية ولا مسؤول؟
كنت بقول ضحية في الأول، بس اكتشفت إني أنا المسؤول عن كل قرار خدته.
- هل كنت خايف من المستقبل؟
كنت مرعوب إني أموت وأنا كدة، أو أعيش بقية عمري منبوذ.
- إيه التأثيرات الصحية اللي لاحظتها؟
ضعف عام، ومشاكل في القلب والجهاز العصبي، وشكلي كان دايماً مبهدل
- هل كنت بتعاني من قلق أو اكتئاب؟
كنت عايش في سجن نفسي من القلق والاكتئاب مبيخلصش.
- هل نومك كان منتظم؟
النوم كان بالمنومات أو من كتر التعب، ومكنش فيه أي نظام.
- هل فقدت شهيتك أو وزنك؟
خسيت جداً ومكنتش باكل خالص، جسمي كان عبارة عن هيكل عظمي
*- هل كان عندك مشاكل في التركيز؟
التركيز كان منعدم، الذاكرة بقت ضعيفة جداً.
- هل حسيت بعزلة؟
طبعاً، كنت عايش في جزيرة لوحدي حتى وأنا وسط الناس، مكنتش بحس بحد ولا حد فاهمني.
- هل كان عندك تقلبات مزاجية؟
حياتي كانت زي المرجيحة، شوية فرحة وهمية وشوية حزن وكآبة ملهمش آخر
- هل زادت عصبيتك؟
كنت بنفجر من أقل كلمة، وأي نقاش كان بيقلب بخناقة.
- هل أثّر الإدمان على ثقتك بنفسك؟
ثقتي بنفسي كانت في الأرض، كنت شايف نفسي إنسان فاشل ومقدرش أعمل حاجة صح.
- هل كنت بتحس بالذنب؟
الذنب كان بياكل في قلبي كل يوم، خصوصاً لما بشوف خيبة الأمل في عيون الناس اللي بتحبني.
- هل فكرت في طلب المساعدة؟
الفكرة كانت بتيجي وبتروح، بس كنت بخاف جداً من الخطوة دي.
- إيه اللي كان مانعك؟
الخوف من الفشل، وإني مقدرش أعيش من غير “المادة” اللي اتعودت عليها.
- هل كنت بتخاف من حكم الناس عليك؟
كنت مرعوب من “الوصمة”، وإن الناس تفضل شايفاني “مدمن” حتى لو بطلت.
- هل كنت مدرك إنك محتاج علاج؟
عرفت إني غرقان ومحتاج “طوق نجاة” لأن قوتي لوحدي مكنتش كفاية.
- إيه أكتر حاجة كانت بتوجعك نفسيًا؟
إني كنت شايف حياتي بتضيع قدام عيني وأنا واقف عاجز مش عارف أعمل حاجة.
- إمتى قررت تبطل؟
لما وصلت لـ “القاع”، ولقيت نفسي هخسر حياتي أو أعيش في الشارع.
- إيه السبب الرئيسي للقرار؟
رغبتي إني أرجع إنسان طبيعي، وأرد كرامة أهلي اللي اتهانت بسببي.
- هل في شخص ساعدك تاخد القرار؟
ربنا سخر لي إنسان غالي عليا وقف جنبي وقالي “لسه فيه أمل”.
- هل حصل موقف غيّر حياتك؟
موقف صعب حصل قدامي لواحد صاحبي مات بجرعة زايدة، وقتها فوقت وعرفت إن الدور عليا.
- هل كان القرار سهل ولا صعب؟
أصعب قرار خدته في حياتي، كان معركة حقيقية بين عقلي وجسمي.
- هل كنت خايف تفشل؟
جداً، كنت خايف أرجع تاني وأخيب أمل الناس اللي صدقتني.
- إيه أول خطوة عملتها؟
اعترفت لأهلي إني محتاج مساعدة فعلاً.
- هل طلبت مساعدة متخصصة؟
أيوه، لإن الإرادة لوحدها مش كفاية في مواجهة المرض ده.
- هل واجهت رفض أو دعم؟
لقيت دعم كبير من أهلي، ورفض ونفور من بعض الناس اللي ميعرفوش طبيعة المرض.
- هل كنت مقتنع تمامًا إنك لازم تتغير؟
في البداية كنت متردد، بس مع الوقت التأكد زاد.
- إزاي بدأت رحلة العلاج؟
بدأت بمرحلة “الديتوكس” أو سحب السموم من الجسم.
- هل دخلت مركز علاج؟
أيوه، قضيت فترة في مصحة لإعادة التأهيل.
- إيه أصعب مرحلة في التعافي؟
أول أسبوعين، وقت الأعراض الانسحابية والتعب الجسدي.
- هل واجهت انتكاسات؟
للأسف حصلت، بس اتعلمت منها إني أكون أقوى.
- إزاي تعاملت معاها؟
مرجعتش لليأس، وقفت تاني وحللت الأسباب اللي خلتني أقع.
- هل كان عندك دعم من الأسرة؟
لولا دعمهم وحبهم غير المشروط مكنتش هكمل.
- هل أصحابك ساعدوك ولا أثروا عليك؟
أصحاب السوء بعدت عنهم تماماً، وأصحاب الفضل هما اللي شجعوني.
- هل غيرت بيئتك؟
طبعاً، كان لازم أغير الأماكن والأشخاص اللي بيفكروني بالمخدرات
- إيه العادات اللي بدأت تغيرها؟
بدأت أنظم يومي، وأنام بدري، وأبعد عن السهر.
- هل لجأت للرياضة أو الهوايات؟
الجيم ساعدني جداً أخرج طاقتي السلبية.
- هل حسيت بتحسن نفسي؟
الجيم ساعدني جداً أخرج طاقتي السلبية.
- إمتى بدأت تحس بالأمل؟
لما عدى أول شهر من غير ما ألمس أي حاجة.
- هل واجهت صعوبة في الابتعاد عن الماضي؟
أكيد، الذكريات بتطارد الواحد بس التعافي بيعلمنا نتعامل معاها
65- هل في محفزات بترجعك تاني؟
المشاكل النفسية أو الضغط العصبي ممكن يكونوا محفزات.
66- إزاي بتتجنبها؟
بالكلام مع المشرف بتاعي (السبونسر) واللجوء لربنا.
67- هل بتتابع مع متخصصين؟
لسه بتابع في جلسات “الدعم النفسي” والمجموعات العلاجية.
68- هل بقيت أقوى نفسيًا؟
بكتير، التعافي مش بس تبطيل، ده بناء شخصية جديدة.
69- إيه أكبر إنجاز عملته بعد التعافي؟
طبعاً، بقيت بشوف قيمة كل لحظة وكل نعمة كنت مهملها.
70- هل نظرتك للحياة اتغيرت؟
طبعاً، بقيت بشوف قيمة كل لحظة وكل نعمة كنت مهملها.
71- إيه أكتر حاجة فخور بيها دلوقتي؟
فرحة لا توصف، كأني رجعتلهم من الموت.
71- إزاي كانت ردة فعل أهلك بعد التعافي؟
الكويسة بس هي اللي رجعت، وبنيت ثقة من جديد.
72- هل رجعت علاقاتك القديمة؟
فيه، وده حقهم، وأنا بحاول أثبتلهم بالأفعال مش بالكلام
73- هل في ناس فقدت ثقتهم فيك؟
فيه كده وفيه كده، بس الدعم بيجي من الناس الواعية.
74- إزاي بتتعامل مع نظرة المجتمع؟
بركز في طريقي، وعارف إن المتعافي بطل مش مجرم.
75- هل بتلاقي دعم ولا حكم؟
فيه كده وفيه كده، بس الدعم بيجي من الناس الواعية.
76- هل بتشارك قصتك مع الآخرين؟
أيوه، عشان أديهم أمل إن فيه طريق للرجوع.
77- هل حاولت تساعد حد تاني؟
ده جزء من تعافيا، إني أساعد اللي لسه بيعانوا.
78- هل المجتمع بيساعد المتعافين كفاية؟
لسه محتاجين مجهود أكبر، خصوصاً في فرص الشغل.
79- إيه رأيك في التوعية بالمخدرات؟
مهمة جداً بس لازم تكون واقعية ومن ناس عاشوا التجربة.
80- إيه اللي محتاج يتغير في المجتمع؟
نظرة “الوصمة” للمدمن، إنه مريض محتاج علاج مش بس عقاب.
81- إيه رسالتك للشباب؟
حياتك أغلى من إنك تضيعها في وهم، الطريق أوله فضول وآخره ضياع.
82- إيه نصيحتك للي بيفكر يجرب؟
متجربش ولا مرة، “التجربة” هي الباب اللي مش هتعرف تقفله.
83- إيه أخطر فكرة غلط كنت مصدقها؟
إني “مسيطر” وأقدر أبطل في أي وقت.
84- هل المخدرات فعلاً بتحل المشاكل؟
أبداً، دي بتزود المشاكل وبتموت الإحساس بيها بس.
85- إيه البدائل الصحية اللي ممكن يلجأ لها الشباب؟
الرياضة، السفر، الهوايات، والتقرب من ربنا.
87- إيه دور الأهل في الوقاية؟
القرب من ولادهم واحتوائهم بدل الهجوم المستمر.
88- إيه العلامات اللي لازم الناس تنتبه لها؟
العزلة، كذب كتير، فقدان الوزن، وتغير السلوك المفاجئ.
89- إيه أفضل وقت لطلب المساعدة؟
دلوقتي حالا، مفيش وقت “صح” غير اللحظة دي.
90- هل في أمل لأي مدمن؟
طول ما فيه نفس طالع وداخل، فيه أمل في التغيير.
91- إيه أهم خطوة في التعافي؟
الصدق مع النفس والاعتراف بالمشكلة.
92- هل ممكن الشخص يرجع طبيعي؟
ممكن يرجع أحسن من الأول كمان لو مشي صح.
93- إيه اللي يخلي الواحد يصمد؟
الصبر، والاستمرارية في حضور الاجتماعات، والدعاء
94- هل الدين أو الإيمان ساعدك؟
كان هو الأساس، الإيمان بيديك قوة فوق طاقتك البشرية.
95- هل التعليم والتوعية كفاية؟ وإيه دور الإعلام؟
الإعلام لازم يبطل يصور المدمن كأنه شخص فاشل أو مضحك
96- إيه اللي تتمنى الناس تفهمه عن الإدمان؟
إن الإدمان مرض “مزمن” بيحتاج رعاية واحتواء مش نبذ.
97- إيه أكبر درس اتعلمته؟
إن الحرية الحقيقية هي إنك متكونش عبد لأي مادة أو شهوة.
98- لو رجع بيك الزمن، هتغير إيه؟
مكنتش هصاحب الناس اللي جروني للسكة دي
99- إيه حلمك دلوقتي؟
إني أعيش حياة هادية، وأربي ولادي في بيئة صحية.
100- إيه الجملة اللي تحب تقولها لنفسك القديمة؟
“أنا آسف إني ظلمتك، بس الحمد لله إني أنقذتك في الوقت المناسب”.
